Lokaleikur Lengjudeildarinnar og lokahóf Leiknis
Það er komið að lokaleik tímabilsins 2024 hjá Leikni. Við klárum þessa Lengjudeild á heimaleik gegn ÍBV laugardaginn 14. september klukkan 14:00. Miðasalan er sem fyrr á Stubbi. Dómari leiksins verður Gunnar Freyr Róbertsson.
Um kvöldið verður svo lokahóf Leiknis. Húsið opnar klukkan 20:00, þar verður gleði og fjör þegar við fögnum strákunum okkar og þessu tímabili.
Leiknir fer inn í þessa lokaumferð í 8. sæti deildarinnar með 27 stig eftir 21 leik og markatöluna 32:33. Leiknir hefur unnið 8 leiki í sumar, gert 3 jafntefli og tapað 10 leikjum. Liðið hefur séns á því að færa sig upp í sjöunda sæti með sigri í þessum leik.
ÍBV er í efsta sæti deildarinnar fyrir lokaleikinn, með 38 stig eftir 21 leik. Markatala ÍBV er 49:26, liðið hefur unnið 11 leiki, gert 5 jafntefli og tapað 5 leikjum. Með sigri í þessum leik tryggir ÍBV sér sigur í deildinni og fer beint upp í Bestu deildina. Ef ÍBV vinnur ekki þá getur Fjölnir farið upp fyrir ÍBV á töflunni og unnið deildina. Keflavík á tölfræðilega möguleika til að vinna deildina en þarf þá að vinna stóran sigur á Fjölni og treysta á að ÍBV tapi í Efra-Breiðholti.
Markahæstu leikmenn deildarinnar fyrir lokaumferðina koma frá ÍBV og Leikni. Oliver Heiðarsson hefur skorað 14 mörk í 19 leikjum í sumar. Hann skoraði eitt mark í síðasta leik þegar ÍBV vann Grindavík 6:0. Omar Sowe kemur næst á eftir honum með 13 mörk í 19 leikjum. Hann skoraði 2 mörk í síðasta leik þegar Leiknir vann Þrótt 2:3 í Laugardalnum.
Síðast þegar þessi lið mættust þá enduðu leikar 1:0 fyrir ÍBV í Vestmannaeyjum. Leiknir sýndi þar mikla og góða baráttu og áttu meira skilið úr þeim leik þrátt fyrir að vera manni færri hluta leiks.
Mætum öll á völlinn, styðjum strákana og fögnum tímabilinu með þeim yfir leiknum og eftir leik.
Áfram Leiknir!