Ungir Leiknismenn lánaðir í Lengjudeildina

Leiknir hefur lánað nokkra af félagsins efnilegustu leikmönnum til liða í næstefstu deild þar sem vonast er til að þeir taki næsta þroskastig á ferlinum með því að reyna fyrir sér gegn sterkum andstæðingum.

Þeir Shkelzen Veseli og Davíð Júlían Jónsson munu spreyta sig í appelsínugulum litum Þrótts í Vogum við Vatnsleysuströnd. Báðir verða þeir 18 ára í júní.

Andi Hoti, miðvörður, er kominn til Magnúsar Más í Mosfellsbæinn þar sem hann mun spreyta sig í miðverðinum hjá Aftureldingu í sumar. Hann varð 18 ára í desember síðastliðnum og er einmitt með U-19 ára landsliði Íslands núna í Króatíu.

Róbert Vattnes Mba Nto er svo kominn til KV sem eru nýliðar í næstefstu deild. Róbert er hægri bakvörður sem varð tvítugur í haust. 

Að sjálfsögðu fylgjumst við grant með þessum ungu mönnum í allt sumar og óskum þeim öllum góðs gengis og fullt af mínútum í reynslubankann.

#Stolt Breiðholts